páskakanínusokkar handa 0-4 ára

og hér er meira páskaprjón :)

Á prjónunum þessa vikuna....



sokkar sokkar sokkar!

Ég skellti í nokkur sokkapör í vikunni og er að reyna að klára síðasta parið vonandi í dag. Sokkarnir eru allir í Sokkaprjón, bókinni góðu, og barnasokkarnir eru prjónaðir úr afgöngum. Ég ætla að reyna að klára sokkagarnsafgangana mína í svona smáverkefni. Sokkarnir eru sætir og skemmtilegir :)

Hér er svo sængurgjöfin hennar litlu frænku. Ég gat ekki sett inn mynd af henni fyrr en daman var búin að fá pakkann sinn. Þetta eru Brækur úr nýjasta Lopi og Band. Ég prjónaði þær úr kambgarni og setti bleikar tökur og mittisband í þær til að gera þær aðeins stelpulegri.
Ég byrjaði á þessum buxum fyrir löngu síðan en setti þær svo frá mér til að prjóna jólagjafirnar. Svo þegar ég tók þær upp aftur þá vafðist uppskriftin eitthvað fyrir mér, reyndar fannst mér uppskriftin stórskrýtin og erfitt að skilja hana! það endaði þannig að ég skáldaði sirka helminginn af buxunum en mér finnast þær ekkert verri fyrir vikið :)

Guðbjörgu vantar nýjar ullarbuxur á leikskólann þannig að ég ákvað að skella í eitt par og hafa þær svolítið jólalegar svona uppá gannið. ég þarf samt að fara að spíta í lófana því þær fara í notkun strax í fyrramálið. Guðbjörg mín verður nú að vera í ullarbuxum innanundir snjógallanum í -10 stiga frostinu hérna í Alta.

Á prjónunum í dag....

er rillestrikket hals... eða garðaprjónskragi.

einstaklega einföld uppskrift af kraga, prjónað á tvo prjóna, fram og til baka. svo er hálsinn saumaður saman og brettur niður. það er um að gera að byrja á ofureinföldum verkefnum þegar maður prjónar á norsku í fyrsta skiptið.

í halsinn nota ég afgang af gulum léttlopa, en þarf sennilega að nota afgang af öðrum lit líka, um að gera að nota afgangana í svona lagað! halsinn verður alveg jafn hlýr og góður fyrir leikskólann :)

Sending frá Marte Helgetun!!!

ég er búin að slefa yfir myndunum úr þessari bók síðan hún kom út en í vikunni lét ég verða af því að panta mér hana. vefslóðin er http://www.martehelgetun.no/

í bókinni eru 26 uppskriftir af fötum fyrir leikskólabörn á aldrinum 1-6 ára. ég er mjög hrifin af þessari bók og sérstaklega garninu sem Marte notar en hún er í samstarfi við Du Store Alpakka og prjónar því úr lamaull.

mig langar rosalega mikið að prjóna bangsakjólinn á Guðbjörgu fyrir jólin. ég keypti í hann rautt Mirasol garn (sem er líka frá Du Store Alpakka). Rautt fyrir jólin! :) en Marte átti ekki litinn til á lager þannig að ég fæ hann í næstu viku.
ég er búin að lesa uppskriftina yfir og ég skil norskuna alveg fullkomlega.

reyndar er það stór kostur hvað allar uppskriftirnar og munstrin í bókinni eru einföld! hlutirnir þurfa ekki að vera flóknir til að vera fallegir.

ég splæsti mér líka í eina dokku af Tynn Alpakka, alveg hreint æðislega létt og gott garn...... en hvað ég geri við það... það er önnur saga :)

þá er nýja lopapeysan hennar Guðbjargar tilbúin. þessi verður sko góð í vetur!
peysan er úr léttlopa, þetta er uppskrift af Ístex síðunni:

http://istex.is/Files/Skra_0039463.pdf

ætli uppskriftin sé ekki í kringum 30 ára gömul, það væri gaman að fá að vita betur hversu gömul uppskriftin er.

Ég er alltaf svo lengi að koma mér í hlutina. En hér er ég loksins búin að setja tölur í golluna hennar Guðbjargar. Gollan er mín eigin hönnun, hún er úr garni sem heitir Mirasol og er frá Du Store Alpakka, já það er lamaull :)
gollan er hlý og góð og Guðbjörg fór í henni á leikskólann í morgun. 

ég er loksins búin að setja ermarnar og búkinn saman á eitt stykki, mikið er ég glöð :)

September 23, 2012

það er svosem ekki mikið af frétta af prjónunum hjá mér. ég er búin að vera að vinna að þessu tvennu núna.

vinnupeysan hans Friðþórs gengur hægt. mér leiddist uppskriftin svo og svo sá ég eftirá að ég hafði gleymt að auka út eftir stroffið á bolnum. hann Friðþór minn er grannur en ekki svo grannur! þannig að ég rakti upp allt klabbið og er núna að gera einfalda lopapeysu með laskaermum. það verður ekkert munstur en af því að ég á gráa lopann þá geri ég í hana einhverjar renndur. þetta er bara hannað svona jafnóðum.

Guðbjörg getur ekki átt nóg af prjónafötum! ég er sko alveg búin að sjá það, enda eru norðmenn mikið með börnin í prjónuðu. auk þess vantar dömuna lopapeysu fyrir veturinn. þetta er gömul einblöðungsuppskrift af síðu Ístex. rosa skemmtileg peysa. ég er náttúrulega svoddan auli að ég byrjaði á bolnum og prjónaði upp og fattaði svo eftirá að ég hafði gleymt að prjóna munstrið neðst. ég ákvað því enn og aftur að rekja upp og prjóna uppá nýtt.

það er þess virði að rekja upp því maður verður svo miklu sáttari á eftir! 

September 23, 2012

hérna er Guðbjörg í kjól úr léttlopa. kjólinn prjónaði ég handa Angelinu, dóttur Dodda og Nan. þá var Angelina 3-4 ára gömul. ég sendi þeim kjólinn og hann passaði ekki á hana þannig að Nan var svo elskuleg að geyma hann og lét mig fá hann þegar Guðbjörg fæddist. 

September 10, 2012

sokkarnir komnir langt á veg

eru þeir of litríkir? mér finnst það ekki… 

September 09, 2012

í dag er það sokkaprjón…. en fyrirsætan mín er ekkert voða ánægð með að máta

September 08, 2012

jæja þá er flíkin tilbúin!!

ég náði að prjóna þessar fínu ermar úr því sem upphafilega átti að vera sokkapar OG ég náði að klára fjólubláa garnið.

en við nánari athugun er flíkin of lítið á Guðbjörgu en passar á Stefaníu seinna meir.

kannski geri ég aðra útgáfu af þessari peysu einhverntímann seinna :)

September 05, 2012

Lailadrakt
http://www.sandnesgarn.no/ShowFile.ashx?FileInstanceId=ca56ea77-0264-4467-9842-d5576fbccbbf

og hér er önnur barnauppskrift sem væri gaman að prjóna. þetta eru samaföt, kjóll, buxur og húfa.

September 05, 2012

samapeysa og húfa á börn
http://www.sandnesgarn.no/ShowFile.ashx?FileInstanceId=8082c5d5-ef27-428c-bcc8-f5e4e67bf773

ég held áfram að gúggla prjónauppskriftir frá Finnmörku. hérna fann ég samapeysu og húfu á börn sem gaman væri að prjóna. þetta er líka einfalt og flott munstur.

September 02, 2012

hér er peysa sem ég var lengi að vandræðast með…. þegar ég kom fyrst til Noregs og fann loksins prjónavörubúðina í bænum þá keypti ég þetta flotta flotta garn Mirasol sem er úr lamaull. ég vissi ekkert hvað ég átti að gera við þetta garn og ég veit ekki hvað ég fitjaði oft upp, prjónaði og rak upp aftur!! en á endanum ákvað ég að skella í svona létta gollu handa Guðbjörgu minni… en eins og með verkefni sem ganga illa hjá mér þá varð þetta ansi langdregið. ég er semsagt búin að vera að vinna í þessu af og til síðast fyrir síðustu jól!